花B仔在澳門的一星期

第一日返到澳門晚上, 簡直係喊到停唔到口

我諗住因為去到一個陌生環境, 而且冇左自己張床D味

抱左成晚, 但我地堅持唔會俾BB同大人同床,

經過2日, 花B仔終於熟左自己張床, 乖乖地聽話

雖然只係返左黎7日,

但花B已經有日夜癲倒既感覺

因為澳門屋企太靜而且陽光俾棟樓遮晒

之前香港戒夜奶行動都破左功

點解夜媽媽仲可以眼仔碌碌架....

生活習慣真係好重要! 影響太大!

B仔開始表情多多, 

平時為左即時捕足到D表情都係用手提話細機映佢,

有一日拎左部大機出黎對住映,

一望到部機, 花B仔即時露出呢個樣, 笑死我地!

真係好有諧星天份...

呢D 射黎射去既眼神一定係跟花爸學...

有時好得意, 有時真係好樣衰 

串得佢.. 好似好多野想講咁...

BB變樣真係變得好快
我由岩岩做新手媽媽覺得好討厭
到依定自己一個做全職媽媽開始有感情
自己一個湊好吃力滿足感又未到好大
但可以睇住一個小朋友成長真係要好好珍惜呢段日子

產後仍記得BB在胎中的聲音

第1晚返到澳門, 黎到一個唔熟悉既環境

平時夜晚訓得好好既BB 今日係咁紐計

有時忍心D真係有用, BB好明顯好中意大人床,

但我地冇俾佢訓.. 最終成功左熟悉澳門張BB床

係唔係個個B都會特定某D時間喊下想人抱架呢~

每晚8,9點就係要人抱GE時間, 

搞到連自己私人時間都冇埋.. 

之後Fa BABA突發奇想:

記得懷孕時我地日日同BB傾計胎教

又成日都聽EASON, 去埋演唱會, 特別中意沙龍呢首歌

仲拍左段胎動既VIDEO

20’ ＆ 45’ 個2part 拍子感好準,

一路聽一路跟BEAT踢

今晚當花B仔係咁喊唔停個時我地播沙龍佢聽

佢好似真係記得咁, 望住I PAD方向, 

估唔到同一個副歌 " 留住溫度速度 溫柔和憤怒..."

即刻唔喊, HOLD住一分鐘, 到音樂即喊

證明當時胎教真係有用架..

花B仔聽完個樣好似去完演唱會咁..哈哈

花B仔滿月喇!!

人地話BB出世,辛苦先開始原來係真架

有D後悔懷孕最後一個月成日想快D出世..

個D都未係最辛苦, 依家最辛苦係每3個鍾喂一次奶

尤其是夜奶最難頂, 好彩花B仔都算識分日夜, 夜晚訓得好冧唔嘈

呢一個月最大變化真係個樣, 真係越黎越可愛

依家D小朋友真係精左好多, 好似認得邊個抱佢咁

出世2星期就開始紐抱,

Fa BABA話要好好珍惜BB仲可以抱係手的日子，將來大個仔冇機會再抱

而我就係主張唔好成日抱慣, 抱開好唔得閒,

真係唔知誰對誰錯...

夜晚就去酒樓一家人食滿月飯,

簡簡單單就好, 希望BB健健康康, 開開心心長大

 而Fa MAMA日子有排捱

過多2 日去健康院打埋滿月針 (乙型肝炎針)就返澳門LU~

開始困身既生活, 對花B仔進行一對一服務, 希望佢中意啦,哈哈

第一次帶去健康院打滿月針

第一次睇住BB打針

我以為自己會好似其他媽媽咁見到個仔喊自己跟住喊

點知我無... 由花B一出世開始我都唔似人地咁母愛氾濫

我跟本就係一個狠心媽媽, 正常嗎?

我同花爸一齊帶花B去打針, 每次聽到其他喊聲BB都好有反應

好彩唔會跟住人地喊.. 唔係都唔知點搞

等到見姑娘時姑娘居然話我地張被好熱,

但我發現出面D媽媽比我地著得仲多衫... 

原來BB溫度比大人高1,2度, 所以唔駛太驚!

打針個一刻, 我唔敢望佢吉落去個下

全程係花爸爸禁住花B仔大脾,

當時情形係吉落去個下冇喊, 一注射即喊

但都係大喊左2聲就訓著左..

其實支針係咪有摧眠成份? 哈哈

乙型肝炎呢支針姑娘話唔會發燒

吉完大脾,返到屋企滅左棉花已經可以沖涼~

唔知下次2個月支針又會點呢?

對不起, 我要放棄當人奶媽了

DAY 5 回家

當屋企人知道我唔夠奶時,

已經又話我懷孕後期叫我飲下木瓜湯又唔飲

唔知係咪生完BB個人會多野諗..

婆婆可能冇心講呢句說話, 但我覺得好內疚

當晚我不段問朋友冇奶但我開始個胸痛應該點做

佢地都支持我泵出黎.. 我今晚飲完青木瓜魚湯真係即刻上奶

兩餐都泵都10ml ( 一安都冇 ) T.T

跟據姑娘教法, 我要補奶粉

阿B係醫院時飲95ml 奶~ 我要補2/3奶粉

每次俾BB埋身啜完後再補粉, 

避免BB中意飲奶咀唔肯埋身食

埋身食1個鐘, 喂埋奶30分鐘

總共要個半鐘, 再訓個半鐘又要起身

不斷REPEAT, 加埋換片洗奶樽根本冇時間休息

花爸爸已經幫左我好多.. 但媽媽快要壓力爆煲...

我真係3分鐘熱度, 經過同花爸商量左成日.. 

我要放棄當人奶媽LU... 諗起95ml奶要追真係太辛苦

DAY 6

有時都好灰心, 覺得自己太無恆心~

但見到自己個仔食人奶後喊晒口,

但食完奶粉見到佢滿足到笑個樣真係好大分別

DAY 7 健康院檢查

出院時姑娘已經吩咐出院就好預約健康院BB同自己做檢查

月都未坐隱就同花爸爸搭的士去母嬰健康院

其實都係做登記同埋CHECK返黃疸, 磅重已經有4.5KG,重左

黃疽指數都落左好多, CHECK多一次如果唔超就OK

姑娘簡單問下我情況, 當佢問我做咩唔喂人奶時,

我又喊.... 真係控制唔到..... 

姑娘都安慰我 : 如果太大壓力, 其實奶粉無問題架..

最緊要自己要休息夠!!

 做好晒檢查就返屋企LU~
果然放鬆心情自然有奶, 我發現自己漲奶
不過都唔想再逼自己.. 但願有第2胎有經驗時可成功啦!!

花爸爸放埋呢幾日假就返澳門, 

大大話話都陪左我地大半個月...

日日喂完奶都對完仔仔傾一下計...

我諗佢返左澳門返工一定好掛住我地~ *v*

BB 黃疸照燈

DAY 4

因為BB留院2日.. 

傷口痛到唔想出街關係

我都冇泵人奶去俾BB飲~ 

返到屋企有試過用AVENT手泵,

點知一滴都無.. 只係可以用水唧到一滴咁多

唔知係我冇經驗唔識按定真係未上奶

原來對左BB 3日已經可以咁掛住佢..

雖然只係映左幾多張, 都足夠我係屋企係咁睇係咁睇

到下午時份, 收到醫院電話,

姑娘話BB體重跌左9%, 聽日去兒科教我點喂人奶

原來阿B 個3日一直都唔飽, 係咁餓...

9% , 由8磅跌到7磅幾, 好似唔多~ 但9%姑娘話BB算嚴重

成日都冇見過BB... 掛住但感覺輕鬆少少~

DAY 5

一早就搭巴士入醫院, 其實我地都幾開心..

因為可以見下阿B, 去到姑娘話黃疸原因都關BB唔夠飽事

可能就係因為咁.. 所以黃疸指數高出左少少

250合格, 阿B都係270.. 仲話俾我地知今日可以出埋院

奶粉真係幫到唔少~ 點知學喂奶個時BB都好唔合作

人姑娘教既時候佢走去訓覺唔肯食, 唉... 學唔到D咩...

我地一家3口今日一齊出院LU... 開心晒!

感覺上阿B黑左少少.. 晒到成個古天樂咁~ HAHA

3天在醫院的日子

平時睇得多明星開刀之後見記者個樣,好似好輕鬆

估唔到自己GE時侯原來咁痛苦...

開刀時打係背脊個2支針都不及藥力過左個種痛楚

藥力過後真係痛到要叫姑娘幫我打止痛針

唔知係咪GOV既料麻麻, 打完都仲好痛

好彩有維持24小時止痛藥塞肛係WORK..

整整一日都唔可以落床~ 

第1日: 24小時唔可以食野

第2日:只可以食粥 / 煲湯去喳

第3日: 可以落床, 食正常餐

為左BB.. 痛住在床上喂人奶~ 只希望佢健健康康!

原來我係手術室推到出產後房Fa BaBa都未見過BB

我係床上一出黎佢同我講左佢" 辛苦你喇! "

有呢句咩都值晒!! 

初生BB 仲未脫皮, 我真係第一次見.. 哈哈

好遺憾唔可以自然分娩, 感覺上做媽媽感覺唔太實在!

頭3日仲未上奶~ 其實都唔知BB夠唔夠飽

不過姑娘話初生嬰兒身體有貯備.. 

睇下隻8磅殉食完個樣幾冧~

不過到左第3日因為黃疸高左少少要去兒科照燈2日..

無奈MaMa要返屋企先~ 留BB係醫院觀察

我以為自己會放鬆左可以返屋企休息..

點知落到兒科見到阿B照緊燈, 我居然喊到收唔到聲..

打針CHECK 黃疽指數打到呆左... 仲要打左2次係腳仔到..

可憐啊.........

40W 花仔出世了

唔知係咪因為胎教關係,
BB真係準時10月3號作動..
初時我仲以為搞肚痛去廁所..

10月3號

23:00 開始肚痛,之後就開始計住30分鐘痛一次

雖然只係M痛咁肚底痛, 但因為心急過左預產期當晚都訓唔著

10月4號

2:00 開始20分鍾痛一次, 其實都係一個鐘痛幾次
我仲懷疑緊, 自己係張床到碌下又去下廁所, 但冇見紅冇穿水

3:00 自己感覺到規律痛, 開始10分鐘痛一次, 痛楚就冇變過, 接受到
我知道要叫醒老公喇~ 我仲問佢入唔入醫院好, 我FEEL到佢好眼訓
3點半考慮到4點鐘, 我地最終都CALL的士入院!!

4:30 去到急症, 有人帶左上產房開始登記駁機
今次已經40W唔會俾人趕走喇掛...
駁左個幾鐘機, 姑娘話一時規律一時好亂, 有冇飲白蓮SO或中藥
我又冇WO... 忍到第2朝仲係10分鐘痛一次, 就去玩下FITBALL
原來FITBALL真係好有用, 一座落去真係冇咁痛, 一次最多坐30分鍾
坐左一次, 再去休息忍痛, 當時醫生只CHECK過一次宮頸少少鬆
就轉左去產前房慢慢等... 醫生話第一胎唔會咁快起碼夜晚先生得
即係仲要等成日.. OMG, 咁我就叫老公返屋企訓陣, 探病時間18:00再黎

13:00 開左3度, 7分鐘痛一次

到左下午LUNCH後,玩左一次BALL已經變左7分鐘痛一次,
仲可以食飯同隔離床傾計, 食飽飯再玩BALL, 當時玩BALL已經開始玩BALL都痛
我知道放鬆心情可以生快D 已經盡量放鬆同埋痛時記得呼吸
醫生第2次檢查已經話我開左3度, 我好開心!! 佢話今晚叫老公食埋飯黎應該差唔多
當時我好肚餓, 我仲叫老公快D買KFC我食

17:30 人工穿水後,4分鐘痛一次

轉左入產房, 醫生再幫我CHECK時佢問我想唔想快少少今晚就生
我當然話想啦! 而且我有B轋可能唔想拖咁耐,
就幫我吊催生針,抗生素,同人工穿水,
穿水個刻唔痛,我FEEL到D羊水真係好熱一次過流好多出黎
之後就開始腰骨痛, 我即時打電話叫老公快D黎唔好買野食
因為已經打左催生, 到左6點探病時間
姑娘知我腰骨好痛叫左老公入產房幫我按摩...
真係舒服好多.. 而且有佢陪住傾計心情好好多..
好記得當時一邊按摩一邊見我好痛你問我:
「好似做唔到D咩幫你咁, 係唔係啊?」
當時我已經痛到唔想答你, 但我真心感動你一路叫BB加油
我依然配合呼吸, 唔知點解我仲接受到個種痛~
我心諗: 快D啦.. 越痛就越快見到BB架LA!!

20:30

點知8點半醫生再CHECK宮頸時,
已經穿水3個鐘, 醫生同我講產程太慢,
想唔想開刀? 我當時晴天霹靂, 喊左出黎!
我問佢:如果唔開係咪要等好耐?
醫生話: 係~ 可能再要等到凌晨

已經接近20個鐘, 我知道可能等落去痛到8度都要開刀,
我即刻自己決定要開刀, 我真係驚BB太重我咁細粒生唔到,
之後醫生就安排麻醉師, 文件俾我簽名
我叫左老公入黎, 同佢講我要開刀, 佢望住我但依然一貫作風好冷靜
就繼續出去等, 不過唔係順產老公就唔可以陪產LU~

21:00

醫生叫我唔好喊, 佢話: 你都想快D見到BB架~
我叫醫生係咁快D, 因為我唔想痛, 我當時真係有D內疚
我想順產都係想BB同自己身體好D.. 但盡力唔到!
之後就推左入手術室.. 一打左針就半身麻醉左.. 咩感覺都冇


我一路睇住個鐘, 手術開始半個鐘左右, 我聽到BB喊聲喇!!

聽到BB喊聲我D眼淚不自覺湧出黎.. 代表BB出左世喇!!

護士抱住BB第一時間問我仔定女再同我講磅數3.67LB,
之後就抱去清潔, 清潔完帶返黎BB比出世喊得更加大聲
姑娘話BB等陣就唔喊架LA, 佢將BB抱上我手口訓住,
真係好神奇即刻收聲, 係咪因為認得我?
到第一次見爸爸時, 又係爸爸一出聲就唔喊,
原來生命就係咁神奇!
雖然產後傷口好痛,
但經歷過生仔一定會忘記懷孕辛酸, 生仔時痛楚, 值得的!

♥Pregnancy Photo @ Joseph photo

36W的孕照

早左36W時去左JOSEPH PHOTO團購家庭照

映完即刻揀左相, 仲以為要等個幾月生完先有得睇相

點知3星期已經可以拎相喇!!

只係加錢PS左12張相, 都幾滿意...

好有媽媽味道.. SWEET !

我地都中意呢呢張, 有點日系FEEL

我的肚臍已經移為平地了

大大的大肚子... 期待中...

4套衫其中一套黑色好似怪怪的 

BABY BOY ,WE LOVE YOU!

39W 4D 疑似穿水, 流料

最後一星期了,
當初個肚咁大個個見到都覺得會足月差不多出世
點知捱下捱下又到最後一星期..

一路都冇咩留意有冇見紅, 諗住肚痛先入醫院
誰不知今日沖完涼突然好似有D野係下面擁出黎咁..
因為中左B轋, 如果穿水要即入醫院
驚唔係一野穿而係少少少少咁漏出黎..
就入一入醫院CHECK下~
入到去急症, 姑娘就帶左上產房駁機,
佢地好似已經估到係流料咁..
醫生用鴨咀幫我睇下話唔見有水出..
再幫我照埋B超... 胎水無少... 我諗都係分秘居多
醫生就講左我知依家BB 已經3.3 KG (7.2LBS)
不過唔係穿水都有可能當晚作動, 已經39W,
就要留一晚醫院觀察下~ 20:30入到醫院, 23:00 CHECK完
轉左去產前房訓左一晚.... 呢一晚真係悶死左....

第2日已經好想返屋企, 冇痛冇紅, 咩異樣都冇
醫生問我: 想唔想返屋企?
我即刻話想, 咁就聽埋BB心跳, 冇咩問題, 下午就出左院

至從呢日開始, 之後3日都有好多鼻涕JELLY狀分秘
希望BB快D可以黎到呢個世界同我地見面啦!!

39W 肚皮已變西瓜皮了

最後一星期...
估唔到呢個星期個肚皮可以係最後一個月加速變大
已經大到爆成世界地圖咁喇!
好彩36W時已經去左映孕照
依家GE我已經唔敢再拎高個肚映相..
真係好驚自己D紋到生左之後仲會跟我一世 T.T

最慘既係爆到不特止...
仲要撑到極點, 所以變到日日夜夜都好痕...
我仲要忍唔到R佢~ 嗚... 咁就越R越痕喇!!

唯一可以解決GE係LOTION+ OIL混合地查,
一痕就查一痕就查...
忍住啊... 仲有一星期就到家鄉LA~~~

肚圍: 43吋 體重: 138 lb

38W BaBy已入盤.. ready

已經每星期一次政府產檢了
37w開始每日家課就係留意胎動

每日都要有十次以上

唔留意開都唔發現個BB可以每個鐘都係肚入面郁身郁勢

38W 1D 政府產檢

唔駛10分鐘, 例牌CHECK下心跳SIZE就OK

SIZE冇問題LU~ YEAH!! 

我就問醫生『依家係咪入盤入到好低喇?因為我恥骨周不時痛』

醫生同我講都入左5分之2,
『咁咪會好快就出世囉』
原來落晒個時BB已經可以出世,
但入左盤都仲要睇埋宮頸O唔OK..
所以.... 一切都係BB話事!

37W 三腫三消

人地話三腫三消後就生得

早在35W已經第1次腫到痛

36W又1次..... 唔通... BB真係會早過EDD出世?

最近答得最多的3大問題：

-緊唔緊張啊？

-驚唔驚你老公趕唔切陪產啊？

-係咪就生得喇？

其實到左呢刻準備晒D野,

個種感覺就係……煮到埋黎就食啦

9個月前已經預左呢日

我唔想想像到時會點

隻仔已經墜到我成個茶壺咁,

連媽咪都話我偉大(間接讚自己)

我最緊張唔係痛幾多個鐘,

陳生趕唔趕得切入產房,

依家最重要我地都可以平平安安!

36W 政府產檢密密做

36W 1D

今日係最後一次要做GE大檢查- 乙型轋球菌檢查
希望會PASS, 咁就可以安心待產了
開頭有少少緊張點樣抽組織化驗
原來都係用棉花棒 5分中都唔駛就搞店!
等一星期37W 產檢就會知結果..

36W 4D

今次係我第1次叫媽咪陪我入去睇..
亦都係最後一次B超見肚入面GE BB喇!
雖然政府照睇唔到樣.. 但我把握呢次免費GE 檢查
諗住一定會點3大問題,
1. BB入左盤未?
2. BB依家幾多磅? (因為個肚突然大左好多呢條太重要)
3. BB臍帶有冇纏頸?

整個過程照左10分鐘都唔駛,
一路照個時我同醫生都冇交流過..
當佢照完已經即時話我知睇下BB幾重會唔會過大,
2. 花仔已經2.96 KG, 由30W 3磅中碼變左依家6磅半中大碼,
仲有幾日就足月, 如果到EDD先出世好難想像會係幾重 OMG
1. BB已經入左少少盤, 其實呢個週數呢個重量都唔會有咩問題
當入晒盤個時已經出得世
3. 政府唔會睇得咁DETAIL, 所以睇唔到

我諗花仔真係會隨時面世 ..

35W 想起很多呢9個月的一點一滴

越接近預產期就越訓得唔好,
一路以黎食飽就訓既日子都過得好好..
但依家個肚越黎越大, 好似訓左邊又唔舒服, 右邊又唔舒服
仲要晚晚起馬3次小便... 有少少羨慕肚細GE媽媽...

每日訓覺之前都同花仔傾一陣計講下每日GE事,
之後就會開始諗下以前同將來...

記得魔王一知道有左花仔之後就開始自動自覺接手晒家務黎做,..
懷孕初期3個月見到我食咩嘔咩都會堅持問我想食咩買俾我,
個刻雖然好辛苦, 但心入面成日都會覺得自己點解咁幸福,
呢D係咪開始緊甜蜜的負擔?
但我一路都好累冇機會同魔王講呢D野,
到我一氣力GE時侯已經掛住食野..

記得一開始唔知係咪受苛爾蒙影響,
澳門連續嘔左2星期, 我知道魔王最怕我喊, 我一喊佢就知道一定係大獲野
為左唔想佢有太大壓力, 就算點唔舒服, 放左工食完飯嘔完就攤上床咩都唔講
到左返香港登記產檢時, 可能真係想爆...
無啦啦有一日我居然坐左係睇緊報紙GE媽咪隔離,
失左控咁一路喊一路講: 媽咪, 我嘔得好辛苦, 你又話你陀得好舒服GE..
媽咪靜係答左我一句: 有BB係咁架喇..
( 雖然當時佢望都冇望過我, 但我覺得佢見到我都覺得辛苦 )
其實邊有阿媽會唔愛錫自己GE仔女丫~ 我好少會係媽咪面前屈服
但呢一件事真係令我好深刻!

花仔亦都令我克服左一件事, 就係抽血,
我真係唔知道原來陀個BB都要起馬抽3次血, 我更加係唔止3次,
但我D血管係幼到次次護士都話好難抽,
當我第1次我問護士仲要抽幾多次血個時,
佢答我, 今次第1次, 之後仲有3次, 我話: 下......
護士就一路抽一路同我講: 第1次有BB? 做阿媽係咁架喇...
(因為要我條血管關係, 佢一路抽一路講話生仔仲痛啦~ 個類GE說話)
我又當場喊到收唔到聲... 諗返都唔知自己發咩神經會咁..
到下一次抽血個護士又係吉左我2,3次搵血管個時,
同我講左句: 你要克服佢架... 做媽媽要堅強D!
至始之後... 我一路用呢句說話支持自己!!
因為我已經係一個媽媽喇。

34W 公立產檢 + 拍孕照

34W1D

我又好好彩團購到家庭相, 可以去返結婚BIG DAY 個間JOSEPH 映相,
200蚊60分鐘, 本來約左30周個肚唔會太大又唔會細到冇效果個時映,
不過又要就返魔王D假期先去到, 34周對於我黎講個肚都好大喇..
我冇團購90分鐘, 因為至在映幾張相留念, 10幾張, 唔會加太多相,
冇PS冇化妝, 自己化妝出去... 帶左3套衫就出左去, 要2個月後先有得拎,
當日己經可以揀埋相, 唔駛走多轉, 睇到D相有D接受唔到, 因為自己已經腫左好多
映到效果幾好, 完全係人的問題, 之後就加左PS錢同加左2張相, 總共加左1000蚊,
我諗要等到生左BABY先可以睇返自己D大肚相, 唔知到時咩感覺呢?


34W6D

今朝廣華產檢完,  醫生問我點解個肚好似咁大? 
我話唔知啊..呢個星期好似大左好多同埋落左好多,
佢就同我講個頭已經係下面, 34W好大機會唔會轉返上去,
問我會唔會去私家照下, 我話我已經冇去私家睇喇, 
因為一路都冇咩問題, 佢就再幫我度多次個肚, 問我有冇亂食野, 係咪唔會再去私家~
我話係啊~ 之後就俾左2個期我, 一個產檢期, 一個照超聲波, 
估唔到臨生之前都可以見多次BB, 
不過又好擔心點解冇啦啦真係個肚大左咁多~ 都唔知有個期係好事定唔好事...

33W 清胎毒

清胎毒, 對於我黎講係一個好重要GE環節
因為懷孕期間好多時都好中意食酸辣同一向都中意食熱氣野
所以想早少少就試下涼野... 如果冇咩肚痛就開始慢慢加落去

32W 食左一舊西瓜, 簡直係夏天最好食GE生果, 等左好耐, 好開心

之後每2日就飲下豆漿 / 豆腐花, 唔知係咪本先熱底
開始食涼野之後便秘都好左少少

33W 就開始食D 腐竹雞蛋糖水...
除左唔熟食身同太毒太濕都開始唔食,
萬一一個未夠40W就出世起馬清左少少先~
希望真係有幫助啦!!!
36W 就可以唔戒係咁食西瓜... 食涼粉... 諗起都開心!


開始收到朋友D禮物, 見到BB野真係好得意..... 成日幻想花仔著上身會點..HAHAHA

32W 當了媽媽才發現...

從前的我, 一直以為自己不太喜歡小朋友,
我好少會用BB話同D B講野, 多數D小朋友都唔會理我,
至從有左花仔之後, 我腦入面所有事情基本上都離不開家庭2個字
原來生命係咁神奇, 當你望住一個小生命一點一點咁長大,
你會發現很多以前沒有為意的事情。

先從有左BB之後, 我開始冇左原來自己,
我剪左我D頭髮, 減少左化妝, 開始俾人話我越黎越漲,
冇左高爭鞋, 靚衫... 我已經唔再BEAUTY喇!!
出街睇既都係BB野, BB鞋, 邊款BB車BB床最適合屋企,
反正全個腦都係為左我地個B~

以前以為要成7,8個月BB先會成為一個人,
原來一切都係我幻想, 早在6星期BB已經有心跳,
由個刻開始我已經係一個媽媽,
我開始注意自己健康, 為的就係好好培養我地粒小種子,
現在看到人地4D相, 我居然會覺得可愛而唔係可怕~

為人父母的過程中, 原來我同老公都不斷成長學習,
明白到母親偉大, 開始晾解媽媽,
因為每個媽媽都由零開始, 邊當媽媽邊學習..

現在的我, 即使胃酸再倒流, 每晚起床幾次, 再辛苦再再累,
我同老公都好期待花仔出世,
其他事就聽天由命, 相信未來日子會更加幸福, 天天驚喜!

原來, 我可以這麼愛一個人, 那個人卻是我們一手培養的。

31W 收拾心情收拾走佬袋

28W 7個月開始媽咪已經叫我得閒執下走佬袋
可能佢見到我個肚都低左好多驚執唔切,
睇完小冊子同上網搵齊資料, 
我冇分2袋, 因為有屋企人幫手, 講好左入院後第2日先幫我同BB執衫去醫院
有咩唔齊直接去附近買都好方便, 盡量一次過搞店方方便便

走佬袋必備

1)  孕婦身份證和丈夫身份證副本    

2)  BB紙尿片一包 ( 拎左講座時幾包NB試用裝 )

3)  產婦衛生巾2包 4) 網褲2包 (12條) 

5)  保暖杯，拖鞋，面巾一條，廚房廁紙，紙巾

6)  BB柔軟濕紙巾一包 ( 講座試用裝 )，凡士林

7)  嬰兒和尚內衣 (2件)

8) 沖洗瓶1個 ( 用家具店6蚊豉油樽代替) 

9)  胸圍兩個                         

10) 牙刷，牙膏 11) 乳墊 ( 6塊, 唔知自己到時會唔會有奶, 備用) 12) 手提叉電, 相機 *** 重要

其他

1) 自己出院衣物

2) 嬰兒出院用品，如和尚袍，包腳衫，包被，帽等等

( 其實買齊必備GE野, 執晒落一個大旅行袋就搞店 )

參考：

威院走佬袋

1 產科門診證 ,孕婦身份證及丈夫身份證副本

2 紙巾2盒,初生嬰兒紙尿片一包, 濕紙巾/連盒, 尿片墊, 大毛巾兩條, 面巾兩條

3 產婦衛生巾1包'非黏貼型' (入院時及剛生完時用, 因入院時若就生得, 就連內衣褲都不可穿)

4產婦衛生巾1~2包 “黏貼型”(生完配合網褲用) ,胸圍2個,網衭3~6兩條

5 保溫杯, 拖鞋, 面巾, 牙刷, 牙膏, 廁紙, 盒裝紙巾, 洗面奶, 面霜, 洗頭水, 沖涼液, 酒精, 沖洗bottle 等日用品 (有些醫院需自備一個熱水樽)

6 紗巾數條(事先要洗軟 / 餵奶墊住用), 小膠盆一個, 棉花一包 (清潔嬰兒臀部時用), 凡士林 (保護bb pat pat)

7 有些醫院要自帶嬰兒和尚袍 (並請標記孕婦姓名, 因怕姑娘推去沖涼時搞亂)

8 產後房床邊小柜上層可上鎖,如有需要,可以自備鎖及匙

9. 頭髮干洗劑賣

10 bb衫 及 你太太的出院衫, 可出院才帶去 (內衫,和尚袍,長袍,羊毛衫(如凍),大毛巾/褸被,BB要包被,手套,腳套,連身衣等, 視乎需要)

30W 自家拍孕照

27W時的大肚子仲可以行動自如
到左30W已經好唔攰, 而且呢D天氣真係熱到屎....
呢個週數好多人都慢慢去映大肚相,
本來都約左朋友今日去映架, 
不過唔知係咪尋晚睇完EASON太累, 加上今日食完野就去沖熱水涼,
無啦啦流鼻血, 好彩上網CHECK話孕婦D血管會比較易流鼻血, 止到就OK
咁我就CANCEL左出去映, 自己同魔王係屋企叫妹幫手映下



結婚週年禮物收到郭ZR1000 可以大排用場, 
屋企個光線都好靚, 映到我個肚皮好白滑,HAHA 完全冇PS過

我地參考人地D相, 始終唔係專業, 普通映幾張拎黎留念

好彩仲未爆紋JA, 希望花仔唔好太大碼, KEEP住咁白淨啦~
34W 再出去映過!! YEAH~ 到時應該又會大個仔好多!!


20' & 50' 好活躍啊!! HAHAHA

29W 第一次私家產檢

返到香港第一次BOOK私家產檢, 一向FOLLOW都係屬中等冇咩特別野,
本來想搵間照4D睇下BB個樣, 但原來產檢都係會睇到, 仲會送2,3張...
如果4D BB唔合作又要再照過, 為左合乎經濟原則我BOOK左產檢睇埋健康

對上一次見BB只係一粒豆咁細粒, 
隔左4個月再一次見面已經係一個人喇! 而且仲有3磅, 中SIZE因為我地唔肯定係BABY BOY/GIRL...
一開始黃醫生就映左條JJ俾我地睇... HAHA

之後就CHECK下羊水正常, 位置正常唔算大~
再話俾我同老公知邊到係胃, 骨骼 個類都冇問題
再睇眼耳口鼻時, 居然用隻腳遮住, 靜係見到個鼻

您真係一個好玩野GE B,
諗住同你見一次面, 爸爸叫您放返隻腳落黎, 您居然2隻腳一齊遮住個樣..
保持神秘感想到時先見面?OK, 好彩你都算聽我話, 我擔心GE都冇出現 XD
冇臍帶纏頸, 冇啜口指, 最緊要健康!

所有野都令我地2公婆好放心...
不過最後醫生居然話BB隻腳算短, 呢樣係我最唔想.... 我唔想BB好似我咁矮..
明明中碼架MA... 希望條腰長補救, 第時長高D..

GS:胎囊大小     
CRL：胎兒頭頂到臀部的距離
AC：胎兒腹圍的長度
BPD：胎兒頭骨橫徑
FL：胎兒大腿骨的長度
HC：胎兒的頭圍
EFBW：預估寶寶的總體重
AFI：羊水指數
FHB：胎心音
FTA：胎兒肚臍位橫斷面積,多數要黎推定體重
DGA：最後一次月經所估出來的胎兒週數
TTD：胎兒肚子的橫徑
APTD：胎兒肚子的前後徑
FSD：子宮底到恥骨聯合上緣的長度，一般來說長度的公分數就等於胎兒的週數。
          例FSD＝24cm大約寶寶就是24週大小。

22W 為了休息, 我離職了

為左BB健康, 懷孕初期真係要好小心,
澳門及香港我都有登記.. 但我其實一路都打算香港生BB的,
因為我係香港永久居民, 好想BB都係跟住我,
不過澳門衛生局好多檢查都係FREE,
例如結構&唐氏, 而香港幫你照左唐氏之後都係每個月檢查一次
BOOK左廣華, 好就好在抽血同檢查都係同一日,
澳門檢查就好SHINE時間, 抽血一日, 檢查一日, 見醫生又一日
返工真係要你請好多假先可以去到!
開頭2邊做檢查, 加上身體太累.. 最終同老公商量後, 我可以做少奶奶喇..YEAH!

雖然經濟上會冇之前咁好, 中意買咩就買咩.. 但可以俾我有半個孕期休息真係好開心
懷孕真係有想像不到的累... 

好慶幸結構時,醫生話VERY GOOD, BB身體咩都中等, 咁就冇咁擔心LU~
之後就安心回港返媽咪到安胎~ 花仔, 你要肥肥白白啊~

當結構時得知BB是男仔, 老公好開心, 唔知點解男人都想要仔仔 = =
仲同我講第一胎係仔, 第二胎咪冇咁大壓力囉~
雖然都打算生2個, 但如果第2個都係仔仔我諗屋企會變得好嘈..
哼! 好似我一定會再生咁.. 梗係啦~ 都唔係你痛!! 

知道性別之後, 第1件事就係可以買野喇~
依家先發現BB野真係一D都唔同, 樣樣都成千蚊, 唔買又唔得~

因為初生時打算香港同媽咪一齊臭,所有野都香港一SET 澳門一SET
咁岩一田大減價係咁買, 仲要以最低價買, 有D野可以唔買都唔買住...
我好相信老人家個句: 以前冇呢D都係咁架啦!!
如果有其他替代品我都唔想買一D生產商為左賺錢而出GE野!!

好期待........

20W 神奇的胎動感覺

[20W]

我好肯定呢D真係胎動喇
前2個星期Feel到有條魚咁係肚入面游下游下
呢幾日一肚餓就有個拳頭輕輕力打出黎咁
果然似我咁為食,一食飽就無動靜


當我12周有返D力氣時, 已經唔駛日日食飽就訓..
已經悶左2個幾月.. 真係好想出外行下~
本來我提議老公去長隆行下睇下動物...

點知!! 佢驚我太累居然帶左我去二嚨喉公園
哈哈.. 差好遠囉.. D動物仲要好老~
不過佢話呢D都係澳門人的童年回憶..
個個都會去過, 第時要帶埋BB黎睇動物,,
算啦.. 行左半日原來真係好累就回定..
雖然有埋怨佢唔帶我去玩下, 其實個心都覺得老公都係想我好姐.. 

到左20W仲未敢返HK, 驚搭車搭船太操勞,
唯有每個WEEKEND搵下澳門有咩地方好去啦~
其中一樣我地最中意就係周圍食, 不過唔食其實都諗唔到有咩好做
終於都食到呢間龍華茶樓, 真係好貴, 茶位都20蚊一個..
果然係食風味... 懷舊丫ma...

24W 肚臍開始移為平地喇~~~

懷孕初期 6W - 12W 孕吐

自從知道有左花仔之後,
估唔到咁快就要感受孕吐O既痛苦,
一路都以為只係好似電視咁..間中入廁所嘔又嘔唔出~
原來係冇呢回事, 絕對係唔會咁舒服!

每一日起身係最想嘔GE時刻,
之後就係食野, 食完會即吐, 最神奇係吐完要即刻食返餅
因為個肚長期冇野都會好辛苦, 有野嘔好過冇野嘔
呢段期間買左好多類型GE餅, 其他野都食唔落....
咁就減左3磅係呢幾個星期之內~

到10W時, 開始有D舒服, 食D話梅真係舒服好多!!
以前我唔食咸濕野同甜野... 依家愛上左~

咁岩撞正新年, 我放棄左全家去旅行, 亦都冇去拜年,
因為返HK團年後, 唔知係咪初期太唔小心又操勞,
試過1次流啡及見紅, 整個初期都心驚膽跳, 訓床休息
原來好多人都試過流啡, 由其是第1胎未隱定..
搞到一個月內都照左3次B超~
所以樣樣野都係等16周先做比較安全~2月足足請假左3個星期, 休息是最重要的!! 

12W 終於食得返多D野, 同老公第1次見BB..
醫生氹得佢勁開心, 我地第1次睇到BB唔係一粒豆豆,
而已經有手手腳腳, 醫生仲同老公講BB同佢SAY HI~
HAHAHAHA BB隻手真係搖下搖下... CUTE*

其實呢個初期老公都幾辛苦, 日日都問我食咩有咩想食,
睇住我嘔... 幫我清理... 真係想多謝佢~ 但孕婦情緒真係好差~
我冇直接講出口, 只有健健康康幫佢生個BB啦!!